Mann gjev opp, men livet grip inn

Veke 53 avrundar Ravatn-hausten 2014 for min del. Sidan i sommar har eg vore gjennom Fugletribunalet, Operasjon sjølvdisiplin og Folkelesnad.

Veke 53 kom før alle desse (2007), og har eit enkelt utgangspunkt. Georg Ulveset er ein middelaldrande, fråskild, resignert lektor som går inn i jula med minimal livslyst. Nokon eller noko må rykka han ut av døsen, og innan det vert nyttår opplever Georg både dødsfall, pinlege familiemøter, pinlege juleselskap, utruskap og pinlege elevmøter, alt tilsett rikelege mengder alkohol.

Agnes Ravatn skriv dialogar som ein trur på, og diktar fram ein hovudperson som er akkurat passeleg på sida av vanlege sosiale omgangsformer. Det frekke og det ettertenksame vandrar fint saman gjennom boka, og Georg finn til slutt ei slags meining i tilværet. Og dersom du trur du har lese nok om sjakk etter ein haust med Magnus Carlsen i alle kanalar, kan eg love deg at sjakkscena i Veke 53 toppar haustens sjakkreportasjar med god margin.